یەكێتی.. سەركردایەتییەكی (بەخۆ فێر)!

بورهان حاجی سلێمان

لە ماوەی 42 تەمەنی ساڵی یەكێتیدا، هیچ كاتێك ئەوەندەی ئێستا دۆخی خراپ نەبووە، تەنانەت لە31ی ئابیشدا كە تەنها لە سنورەكاندا چەند سەد مەترێك زەوی لە ژێر پێیدا مابوو، ئەوەندەی ئێستا ئایندەی ئەو حیزبە ناڕوون و مەترسیدار نەبوو، چونكە ئەوكات ئەوەی دەگوزەرا پیلانگێڕی سیاسی و شكستی سەربازی جەنگێكی ناهاوسەنگ بوو، یەكێتیش ئەو جۆرە گورزانە ئەوەندەی تر پشتئەستوور و بەهێزی دەكرد.. سروشتی ئەو حیزبە وایەو هاتنەبوونیشی وەكو زەرورەتێك لە ئاكامی شكستیەوە بووەو دوای هەر كەونێكیش تۆكمەیی ریزەكانی هەمیشە گرەنتی هەڵسانەوەو تێپەڕاندنی قۆناغە سەختەكانی بووە، بەڵام ئەوەی ئێستا دەگوزەرێت، جیا لە پیلان و هەڕەشە دەرەكییەكان، شێرپەنجەیەكی ناخۆییەو خەریكەوە لە ناوەوە ئێسكە پەیكەری دەخوات.

ئەوەی لە ناو یەكێتیدا دەگوزەرێت ململانێی فیكری و ركابەرێتی شەریفانە نییە لەسەر ئەوەی كێ زیاتر خزمەت بەو حیزبەو جەماوەرە بەوەفاكەی دەكات، بەڵكو بەشێكی زۆری شەڕی دەسەڵات و دەستكەوتی ئابورییە، لەوانیش مەترسیدارتر ئەوانەن كە بە ئاگا و بەبێ ئاگا فەرمانی ناحەزانی حیزبەكەیان و ئەجێندای دوژمنەكانی جێیبەجێ دەكەن، ئەگەرنا چۆن لێدوانەكەی فەرماندەی هێزەكانی 70ی یەكێتی لێكدەدرێتەوە كە بۆ رادیۆی دەنگی ئەمریكا داویەتی و ئاژانسی باسنیوزی پارتی بەدواچوونی بۆ كردووە؟ 

ئەوێك خۆی وەكو فەرماندەی باڵای هێزەكانی یەكێتی و كەسێكی باوەڕپێكراو لای مەسعوود بارزانی فەرماندەی گشتی ئەوكاتی هێزە چەكدارەكان بەرپرس بێت لەو شكستەی لە كەركوك بەسەر هێزەكانیدا هات، بەڵام شكستییەكانی دەخاتە پاڵ خەڵكی دیكەو وەك ئەوەی میژوو رەحم بكات و چاوی نەبێت، خۆی لەو بەرپرسیارێتییە دەدزێتەوە، لە كاتێكدا دەبێت ئەو بێدەنگ بێت و خەڵكی دیكە لێی بێنە دەنگ و لیژنەیەكی باڵای لێپێچینەوەی لەسەر پێكبهێنن سەبارەت بە دۆخ و ئامادەسازی سەربازی لە میحوەری چواری باشوری كەركوك، چونكە لە دوای ریفراندۆمە شوومەكەی 25ی ئەیلولەوە كە فەرماندەی هێزەكانی 70و ئەندامی مەكتەبی سیاسی هەڵوەشاوەی یەكێتی یەكێك بووە لە موریدەكانی بارزانی بۆ ئەو پرسەو لە چەندین سیاسەتی كوشندەی دیكەش پشتگیرو هاوكاری بووە، ئەو میحوەرە چەك و تەقەمەنییان وەكو پێویست نەبووە، بەڵام ئەو فەرماندەیە هیچ كات لەسەر جیاوازی كردن لە نێوان بەرەكانی جەنگ نەهاتۆتە دەنگ، كەچی ئێستا بۆ ناشرینكردنی حیزبەكەی و پەردەپۆشكردنی شكستی خەڵكی دیكە، لێدوانی چەواشەكارانە دەدات و بەوەشەوە ناوەستێت دەیەوێت ئەوەندەی دیكە بەنزین بەسەر ئەو ئاگرەدا بكات كە بۆ سلێمانی خۆش كراوە.

هەموو ئەمانە راستییەكی تاڵن و بەبەر چاوی هەمووانەوە بەڕێوەدەچن، هەر مەگەر خواو خۆیان دۆستەكانیشیان بزانن لە رپشتی پەردەوە چی روودەدات، بەڵام یەكێتی بەتەواوی عەزمی لێپێچینەوەی لەدەستداوەو زۆر سەختیشە بتوانێت بەم سەركردایەتییەی ئێستایەوە كەشتییەكی مام بگەینێتە بگەیەنێتە كەناری ئارام و لەم گێژەۆڵەكەدا قوتاری بكات، بۆیە پێویستی بە نەشتەرگەرییەكی خێرایە بۆ بڕینەوەی وەرەمەكان، تاكو تەواوی جەستەی نەگرتۆتەوە، ئەو نەشتەرگەرییەش بوێرییەكی گەورەو دانایی و توانایەكی زۆری دەوێت بەڵام لە نەوەی یەكەمی یەكێتیدا (كە تەنها بە خۆیان فێرن) بوونیان نەماوە.

PM:07:53:27/12/2017




ئه‌م بابه‌ته 453 جار خوێنراوه‌ته‌وه‌‌