بوون بە عەمید لە گەندەڵستاندا

شاناز ئیبراهیم ئەحمەد

ئەگەر چی خانەنشینی مافی هەموو مرۆڤێكی سەر ڕووی ئەم زەمینەیە بەڵام دیارە لەبەر ئەوەی كە خانەنشین كردن لەمەملەكەتەكەی ئێمەدا پێوەری بۆ نیە و پەیوەندی بە تەمەن و ساڵی خزمەت و هیچ باب و مەرجێكی خانەنشینیەوە نیە هەر بۆیەش ئەبەنین مناڵێكی كە هێشتا دەمی بۆنی شێر ئەدات بە پلەی وەزیر یانیش لیوا خانەنشین ئەبێت یان ئەكرێت…!! ‌

لەگەڵ ئەوەشدا كە لە مەملەكەتەكەماندا نادادپەروەریەكی بێ ئەندازە بەرامبەر بە خانەنشینان ئەكرێت و بە هەزاران خانەنشینی (علوج) و بن دیوارمان هەیە بەس هەر هەمووی خراوەتە لایەكەوە و خانەنشین كردنەكەی من كە بەمەبەست و بۆ پرۆپاگاندەی سیاسی و ناوزراندن بووە هەمیشە وەك مەسەلەیەكی عاجباتی و سەرسوور هێنەر لە هەرێمێكی سەرتاپا گەندەڵ دا تەماشا ئەكرێت و هەر ئەوەندەی كە لە هەڵبژاردن نزیك ئەبینەوە ئەبێتەوە بنێشتە خۆشەی دەمە پیسەكان…

چەند ساڵێك لەمەوبەرو بە بێ ئاگاداری خۆم و بە بێ ئەوەی كە تەنانەت هیچ بەڵگەیەكی هاووڵاتی بوونم هەبووبێت و رۆژێك بەشداری شەڕم كردبێت و تەنانەت بشزانم دارلاستیكیش بەكار بێنم چ جای چەك بە قودرەتی قادر بە روتبەی عەمید خانەنشین كرام و منیش وەك هەموو بینەران لە رێی میدیاكانەوە ( KNN ) بیستم كە خانەنشین كراوم كە ئەوەش لە كاتی هەڵبژاردنەكاندا بوو..!! ‌ لێتان ناشارمەوە سەرەتا كە وێنەیەكی فۆتۆشۆپ كراوی خۆمم بە تاج و نەجمە و كڵاوی عەسكەرییەوە لە میدیاكاندا‌ بینی بە گاڵتە وەرم گرت و زۆریش بە وێنەكەم پێ كەنیم و كاتێك كە زانیم نەخێر راستە..!! پەیوەندیم بە مەكتەبی سیاسیەوە كرد كە ئایا بۆ و چۆن و لەسەر چ بنەمایەك و كێ خانەنشینی كردووم بە بێ ئاگاداری خۆم و بە بێ بەڵگە و بە بێ ئەوەی كە داوام لێ بكرێت كە هیچ جۆرە فۆرمێك پڕ بكەمەوە… پرسیارم كرد ئایا كە خەڵك خانەنشین ئەكرێت ئەی نابێت هەر هیچ نەبێت كەسەكە ناسنامەی هاووڵاتی بوونی لەبەردەستدا هەبێت ( كە من جگە لە دەفتەر نفوسێكی ١٩٥٧ كە ئەویشم زیاتر لە دوانزە ساڵ بوو لێ وون ببو) و رۆژی لەدایكبوون و ئەدرەس و ناوی دایكی بزانرێت؟ كاتێك كە پرسیارم كرد باشە ناوی دایكم چیە؟‌ هەر سێ برادەرەكە وتیان بێ قەزا بیت كەس هەیە ناوی دایكت نەزانێت وتم باشە ناوی دایكم چیە؟ وتیان (گەلاوێژ‌) كە ڕاست نەبوو.. چونكە ناوی راستی دایكم گەلاوێژ نیە و وتم باشە منتان وەك دانیشتووی كوێ نوسیوە؟ بەریتانیا یان كوردستان؟ و كێ لە باتی من پەنجە مۆر یان ئیمزای كردوە؟؟؟ بێ گومان كەس وەڵامی هیچ یەك لەو پرسیارا‌نەی لا نەبوو لە كۆتاییدا وتم باشە گەر وەك رێزلێنانێك خانەنشینتان كردوم ئەی بۆ پێش ئەوەی كە بیدەنە میدیاكان خۆمتان لێ ئاگادار نەكرد؟؟ پاش ئەوە داوام كرد كە بڕیارەكە هەڵوەشێننەوە و لە رێی چەند پارێزەرێكەوە بەو كارە هەڵساین و كاتێك كە لە رێی هەرێمەوە لە بەر نەبوونی هیچ یاسایەك بۆ هەڵوەشاندنەوەی ئەو جۆرە بڕیارانە شكستمان هێنا و كەس ئامادە نەبوو كە ئەو كارە بكات بۆیە پەنامان بردە بەر بەغدا و لەوێش وتیان ئەوە داوایەكی سەیرە و كەس لە مێژووی عیراقدا تەنازولی لە خانەنشینی نەكردوە و پاش ساڵێك و دوو مانگ هەوڵدان بە سوپاسەوە تەنازول كردنمیان لە مافی خانەنشین بوونم وەك هاوڵاتیەكی عیراقی بۆ یەكەم جار لە مێژووی عیراقدا پەسەند و تۆمار كرد و پاش ئەوەش لە رێی كۆنگرەیەكی ڕۆژنامەوانیەوە گشت میدیا بینراو و بیستراوەكان لەو بابەتە ئاگادار كران و جەخت لەوە كرایەوە كە بە پێی یاسا هەركەس و لایەنێك ئەو بابەتە لە دژم بەكار بهێنێت ئەوا ڕووبەڕوی لێپێچینەوە دەبێتەوە..

بەڵام دیارە لە وڵات و هەرێمە نوقمی گەندەڵیەكەی ئێمەدا تەنیا بازاری پڕۆپاگاندەی ئاژاوەگێڕ و هەرچی و پەرچی و كۆیلەكان گەرمە و موشتەری دائیمی هەیە..!!!

بۆیەش لەو هەزاران هەزار خانەنشین كراوەی‌ هەرێمەكەمان هەر خانەنشینیەكەی من (لەگەڵ هەڵوەشاندنەوەشیدا) هەر باسە وەك ئەوەی كە من خەڵكی مەریخ بم و لە هەرێمێكی بێ گەردو یاسا سەروەردا خۆم خۆمم خانەنشین كردبێ..

سەیرە كەسێك باكی بەوە نیە كە تەحسین شاوەیسێكی جاش بە پێشمەرگەی دێرێن ناونووس بكرێت و مووچە و پلەكەی لە مامەریشە بەرزتربێت و بەدەیان رەفیق حزبی و موستەشارو ئەنفالچی و بەچكە جاش و بەچكە مسئول و بەرپرسی حیمایەی ئەم و ئەو بە روتبەی لیوا و عەمید و عەقید و وەزیر خانەنشین بكرێن…

بەهەر حاڵ من چاك ئەزانم دەردی ئەو ئاغا و كۆیلانەی كە لە ژێر عەبا و پەچەوە ئەو مەسەلەیە ئەوروژێنن و تۆمەتی داگیركردنی ئەرزە و خانو و ڤێلا و پشك و مشك و خانەنشینی و بردنی قوتی خەڵكیم ئەدەنە‌ پاڵ چیە!!

هەر بۆیەش زۆر جارم وتوە فەرموون ئەوە ئەرزو ئەوە گەز دەبا بۆ یەك جاریش بێت غیرەت بتانگرێت و وەرن تا ڕووبەڕوو بە بەڵگەوە بدوێن و با خەڵكی بزانن كە من خانەنشینم یان نا و لە ١٩٧٧ وە تا كۆتایی ٢٠١٧ چیم هەبووە و ئێستا چیم هەیە و ئەوان چیان هەبووە و ئێستا چیان هەیە..!!

جا ئەگەر‌ بۆ ناو زڕاندن نەبێت ئەی بۆ هەموو بەرەو هەڵبژاردنێك ئەكرێمەوە عەمید لەم گەندەڵستاندا بە مەرجێك كە نە عمید بم و نە جندی !!!


PM:02:57:31/12/2017




ئه‌م بابه‌ته 315 جار خوێنراوه‌ته‌وه‌‌