قائیمقامی سلێمانی: ئاگاداری دوکان و فرۆشگای دەکاتەوە

PM:02:28:14/01/2018
کورد میدیا:
سەرۆكی لیژنە هاوبەشەكانی قائیمقامیەتی سلێمانی ئاگاداری دوكان و فرۆشگای بازار و گەرەكەكان دەكاتەوە، نێرگەلەی كارەبایی بە مێرد منداڵ نەفرۆشن.

بەهۆی بڵاوبوونەوە و فرۆشتنی بە مناڵی خوار هەژدە ساڵ، لیژنە هاوبەشەكان ئاگاداری دوكان و فرۆشگای بازار و گەرەكەكان دەكاتەوە، نێرگەلەی كارەبایی بە مێرد منداڵ نەفرۆشن، سەرۆكی لیژنە هاوبەشەكانی قائیمقامیەتی سلێمانیش رایدەگەیەنێت هەرشوێنێك سەرپێچی بكات رووبەرووی یاسا دەكرێتەوە.

گۆران قادر، سەرۆكی لیژنە هاوبەشەكانی قائیمقامیەتی سلێمانی لە ڕێگەی ڕاگەیەندراوێکەوە کە کۆپیەکی بۆ (کوردمیدیا) نێردراوەە ڕایگەیاند" لەبازاردا جۆرە نێرگەلەیەك بڵاو بۆتەوە كە بەپیل و باتری كاردەكات، دوكاندارانی بازار و گەرەكەكان بە مناڵی خوار هەژدە ساڵیان فرۆشتووە، دایكان و باوكان سكاڵایان لای لیژنەكان تۆماركردوە".

سەرۆكی لیژنە هاوبەشەكان ووتیشی" نێرگەلە زیانی زۆری بۆ سەر تەندروستی مرۆڤ هەیە، بەتایبەت منداڵ كە پێویستە رێگریان لێبكرێت لە بەكارهێنان، خاوەنی هەر دوكانێك نێرگەلە بە مێرد منداڵ بفرۆشێت، رووبەرووی یاسا دەكرێتەوە".

ئاشکراشیکرد، كافتریاكانی نێرگەلە ئاگاداركراونەتەوە رێگری بكەن لە هاتوچۆكردنی منداڵی خوار هەژدە ساڵ و نابێت نێرگەلەی پێشكەش بكرێت، هەر شوێنێك سەرپێچی لە رێنماییەكانی كاركردن بكات، لەلایەن لیژنە هاوبەشەكانەوە رووبەرووی یاسا دەكرێتەوە.

 گۆران قادر، داوا لە دایكان و باوكان دەكات چاودێری منداڵەكانیان بكەن، رێگریان لێبكەن لە بەكارهێنانی ئەو جۆرە نێرگەلە و لە گومانی هەبوونی لە دوكانی گەرەكەكاندا لیژنە هاوبەشەكانی لێ ئاگاداربكەنەوە.

زۆرترین خوێنراو‌