سەرەڕای دواكەوتن‌و نەدانی مووچەكانیان دەوامی پێشمەرگە زیاد دەكرێت

AM:11:18:14/01/2018
ژیان: شۆڕش محەمەد
سەرەڕای دواكەوتن‌و نەدانی موچەكانیان لەكاتی خۆیدا، دەوامی هێزەكانی پێشمەرگە بۆ 15 رۆژ لەمانگێكدا زیاد دەكرێت‌و لەكاتێكدا پێشتر تەنها 10 رۆژ لەمانگێكدا دەوامیان دەكرد.

ئەوەش لەكاتێكدایە، بەهۆی نەبونی پارەوە تائێستا بەشێكی زۆری پێشمەرگە موچەی مانگی (ئەیلول)ی 2017ی پێنەدراوە لەكاتێكدا لەمانگەكانی رابردوودا وەزارەتی پێشمەرگە یەكەمین وەزارەت بوو كە موچەی پێدەدرا.

قادر رەزگەیی، ئەندامی لێژنەی كاروباری پێشمەرگە لەپەرلەمانی كوردستان بە (ژیان)ی وت "وەزارەتی پێشمەرگە ناتوانێت موچە دابین بكات‌و تەنانەت ناتوانێت ئازوقە‌و خواردنی پێویستی ژەمەكانی خواردنی پێشمەرگە لەكاتی دەوامكردنیان دابین بكات كەچی واجب‌و دەوامی پێشمەرگەی زیاد كردووە".

قادر رەزگەیی، وتی "لەنێوان هێزەكاندا جیاوازی زۆر دەكرێت‌و لیوا هەیە 10 بە 10یە‌و لیوا هەیە 15 بە 15یە‌و لیوا هەیە 7بە7ە‌و شوێن هەیە 7بە 20ە‌و جیاوازییەكی زۆر هەیە".

ڕەزگەیی، دەڵێت "لەكۆبوونەوەیەكی لەگەڵ وەزیری پێشمەرگە بەوەكالەت پێی وتوە ئێوە كەناتوانن موچەیان پێبدەن‌و خۆراكی ژەمەكانیان بۆ دابین بكەن لەكاتی دەوامكردنیان چۆن واجب‌و دەوامیان زیاد دەكرێت".

لەدوای رووداوەكانی 16ی ئۆكتۆبەری 2017 و لەدەستدانی بەشێكی زۆری خاكی كوردستان، هەرێمی كوردستان زۆرێك لەداهاتەكانی مانگانەی لەدەستدا‌و بەو هۆیەوە پێدانی موچەی مانگی ئەیلوولی فەرمانبەرانی هەرێم دواكەوت.


زۆرترین خوێنراو‌