ئەحمەدی حاجی رەشید: ئامادەنیم بەرگری لە گەندەڵی و دزی و فزی كەس بكەم

AM:10:58:13/01/2018
كورد میدیا:
سەرۆكی فراكسیۆنی كۆمەڵی ئیسلامی لە نوینەرانی عێراق هێرشی توندەكاتە سەر پارتی و سەرۆكی فراكسینی ئەو حزبە لە بەغداد تۆمەتبار دەكات بە لێكترازانی دەنگی كوتلە كوردیەكان.

ئەحمەدی حاجی رەشید، سەرۆكی فراكسیۆنی كۆمەڵی ئیسلامی لە ئەنجومەنی نوێنەرانی عێراق، لەمیانی ڕاگەیەنراوێكدا لەبارەی لێدوانێكی (خسرەو گۆران) سەرۆكی پێشوی فراكسیۆنی پارتی لە عێراق دەڵێت"لەبەرئەوەی خەسرۆمان نەكردە سەرۆكی هاوپەیمانی فراكسیۆنە كوردستانییەكان بۆیە نەیهیشت كورد یەك پارچە بیت و ئەو هاوپەیمانیە دروست ببێت چونكە ئەوە ئیوەن یان دەبێ خۆتان بن یان نابیت كەس ببیت".

دقی ڕاگەیەنراوەكە:

وەڵامێك بۆ خەسرەو گۆران سەرۆكی پێشووی فراكسیۆنی پارتی

لەسەر ئەو درۆ و بوختان و چەواشەكاریانەی كە خەسرەو گۆران سەرۆكی پێشووی فراكسیۆنی پارتی لە ئەنجومەنی نوێنەرانی عێراق لە چاوپیكەوتنیكی لەگەڵ رادیۆی دەنگی ئەمریكا كردویەتی كە من لێرەدا نامەوێت دیفاع لە خۆم بكەم چونكە خۆی دەزانیت ئەگەر قەناعەتم بە بابەتیك هەبوو زۆر بەراشكاوی دەیڵێم و دەیكەم و چاكیش دەزانیت كە ئامادەنیم بەرگری لە گەندەڵی و دزی و فزی كەس بكەم، هەموو كوردستانیانیش دەزانن و بەتایبەتیش جوتیاران كە یەكیك بووم لەوكەسانەی هەمیشە پاریزەرێكی شایستە داراییەكانی جوتیاران بووم، ئەوە بازرگانە حیزبیە چاوچنۆكەكانی ئێوەن كە گەنمی موسڵتان لە ریگەی دهۆكەوە تیكەڵ بەگەنمی جوتیارانی بەدبەخت كرد تا قەیرانی نەدانی پارەی جوتیارانی لێ دروست بوو.

سەبارەت بەقسەیەكی بێ بنەمای خەسرەو كە من لای عەبادی باسی هاتنی گەنمم كردبێت ئەوە (٤) سەرۆك فراكسیۆن ئەگەر یەكیكیان پشتراستی قسەكەی كردەوە ئەوا من ئامادەم سزای خۆم وەرگرم دەنا خەسرەو گۆران ئەو جوامێرە نیە لەڕووی مندا هەڵسیتەوە. با ئەوەشی بیر بخەمەوە كەبە درۆ و دەلەسە نامەیەكی وەزارەتی پێشمەرگەی هینابوو بۆ پەرلەمان تا دەوام نەكات و چاكیش پیشمەرگەكان دەیناسن مەگەر بۆ وێنە گرتن بەرەكانی شەری بینیبێت ئەگەرنا ھەر لە دەزگای ھەڵبژاردنی حزبەكەی خەریكی دانانی پلانی ساختەكاری ھەڵبژاردنەكان بوە، ئەوە ئەحمەدی حاجی رەشید نیە پێویستی بە بانگەشە هەبێت تا پێش وەختە بیكات ئەوە خەسرەو خۆیەتی كە پیویستی بە بانگەشە هەیە بیكات بۆ ئەوەی فەزیحەی سەحبكردنی پێ بشاریتەوە كە بەزۆر ئیستیقالەیان پێ كرد دەشزانم ئەوەشی لەبیر نەچوە و تا ماوە ئازاری دەدات كە چۆن دوچاری سەرزەنشت بوو كاتیك بەفراكسیۆنیكی (25) كورسیەوە و بەو هەموو پەیوەندیەوە نەیتوانی كێبڕكێی كاندیدی كۆمەڵ بكات لە هەڵبژاردنی بڕیاردەری لیژنەی دارایی و بەدرۆش سوێندی دەخوارد كە ئاگای لەكاندیدبونی نوینەری پارتی نیە لەكاتیكدا فراكسیۆنی بەرانبەری تەنها (3) كورسی هەیە، سەبارەت بەبانگەشەی پێش وەختی كۆمەڵ زوورە بڵێم ئەوە حیزبەكەی ئەحمەدی حاجی رەشید نییە كە پێویستی بەبانگەشەی پیش وەخت هەبیت چونكە خەڵكی شایەدی هەڵوێستەكانی كۆمەڵن لە دژی خۆسەپاندن و گەندەڵكاری ئەوە حیزبەكەی جەنابیانە پێویستی بە بانگەشە هەیە چونكە هەركەسی ناردە بەغداد هەر خەریكی پیس خۆری و بەدكاری بوە بۆیە هەندێكیان دوایی بە تڕۆكراوی ناردنەوە بۆتان لە وەزیرو گزیرو بەرێوەبەری گشتی و تا دوایی شتی تریشیان زۆرە با باسیان نەكەم، سابەرەت بەیەكڕیزی كوردیش ئەوە لەبەرئەوەی خەسرۆمان نەكردە سەرۆكی هاوپەیمانی فراكسیۆنە كوردستانییەكان بۆیە نەیهیشت كورد یەك پارچە بیت و ئەو هاوپەیمانیە دروست ببێت چونكە ئەوە ئیوەن یان دەبێ خۆتان بن یان نابیت كەس ببیت.

ئەحمەد حاجی ڕەشید
 سەرۆكی فراكسیۆنی كۆمەڵی ئیسلامی كوردستان
لە ‌ئەنجوومەنی نوێنەرانی عێراق
13/2018