داوای بەدواداچوون بۆ رەوشی ئۆجەلان دەكرێت

PM:05:36:12/01/2018
كورد میدیا:
پارێزەرەكەی ئۆجالان باسی لە گۆشەگیركردنی ئۆجالان دەكات و دەڵێت دەبێت سەندیكای پارێزەرانی توركیا بەدواداچوون بۆ ڕەوشی ئۆجالان بكەن.

گونفەر قەرەدەنیز پارێزەری ئۆجالان ، باسی لەو گۆشەگیریە كرد كە لەسەر ئۆجالان پەیڕەو دەكرێت و ماوەی حەوت ساڵە ڕێگە نەدراوە پارێزەرەكانی سەردانی بكەن، بۆ ئەو مەبەستەش داوای كرد پارێزەرانی توركیا و سەندیكای پارێزەران بكەونە هەوڵدان بۆ ئەوەی ئەو ئەشكەنجە و گۆشەگیرییە كۆتایی بێت.

 وتیشی" ئۆجالان گەرەنتی ئاشتی توركیا و ڕۆژهەڵاتی ناوەڕاستە، هەربۆیە هەموو كەسێك پێویستە دژی ئەو سیاسەتە بوەستێتەوە و دەنگی خۆی هەڵبڕێ".

قەرەدەنیز ئاماژەی بەوەشكرد" ئەوە حەوت ساڵە ڕێگە نادرێت پارێزەران چاوپێكەوتن لەگەڵ ئۆجالان پێكبێنن، هەرجارە و بە بیانویەكەوە داواكەیان ڕەتدەكرێتەوە، بەڵام ئێمە دیسان هەر بەردەوام دەبین لەسەر داواكاری ئەوەی بچینە ئیمرالی و چاوپێكەوتن لەگەڵ ئۆجالان بكەین".

ئەو پارێزەرەی ئۆجالان ئەوەشی خستەروو" فكری ئۆجالان بۆ ئاشتی و ئارامی لە ڕۆژهەڵاتی ناوەڕاست دەرفەتێكی مەزنە، هەربۆیە دەبێت هەر كەس بكەوێتە ناو هەوڵدانەوە بۆ ئەوەی ئەو گۆشەگیریە كۆتایی بێت".

ناوبراو جەختیشیكردەوە" دەبێت هەموو پارێزەرانی توركیا فشار بخەنە سەر وەزارەتی داد تاوەكو ڕێگە بدات چاوپێكەوتن لەگەڵ ئۆجالان پێك بێت".

لە مانگی نیسانی ٢٠١٥وە تا ئێستا شاندی ئیمرالی نەیانتوانیوە بچنە ئیمرالی و چاویان بە ئۆجالان بكەوێت، دواهەمین جاریش لەژێر فشارێكی زۆردا ڕۆژی ١١ی ئەیلولی ٢٠١٦ بنەماڵەكەی سەردانی ئیمرالیان كرد و چاویان بە ئۆجالان كەوت.

لە ١١ی ئەیلولی ٢٠١٦وە تا ئێستا هیچ زانیاریەك لەسەر ڕەوشی ئۆجالان نییە، سەرەڕای ئەوەی بنەماڵەكەی بەردەوام داواكاری پێشكەشی دادگا دەكەن بۆ ئەوەی سەردانی ئۆجالان بكەن، بەڵام داواكەیان ڕەتدەكرێتەوە، هەروەها لە ساڵی ٢٠١١وە تا ئێستا پارێزەرانی ئۆجالان ٧٢١ جار داواكاریان پێشكەش كردوە بۆ ئەوەی بچنە ئیمرالی بەڵام داواكەیان ڕەتكراوەتەوە.