64 كۆچبه‌ر له‌ كه‌ناراوه‌كانی‌ لیبیا خنكان

PM:11:55:08/01/2018
كورد میدیا:
64 كۆچبه‌ری‌ نایاسایی له‌ كاتی‌ هه‌وڵدان بۆ گه‌یشتن به‌ وڵاتانی‌ ئه‌وروپا بەهۆی نوقمبوونی بەلەمەكەیانەوە لە نزیك كەناراوەكانی لیبیا خنكاون.

رووداوەكە رۆژی شەممەی رابردوو روویدا كاتێك 150 كۆچبەر لەرێی بەلەمێكی چووپەوە ویستبوییان خۆیان بگەیەننە ئەوروپا، بەڵام بەهۆی بەهێزی شەپۆلەكانی دەرباوە بەلەمەكەیان نوقم بوو.

تیمەكانی فریاكەوتن توانییان 86 كەس لەو كۆچبەرانە رزگار بكەن و تەرمی 8 ژنیش لە دەریا دەربهێنن.

رێكخراوی پزیشكانی بێ سنوور لەبارەی رووداوەكەوە رایگەیاند چەندین منداڵ لەنێو ئەو كۆچبەرانەدا بوون كە چارەنووسیان نادیارە و بڕوا وایە خنكابن، لەنێو ئەوانەشدا كە رزگار كراون منداڵێكی 3 ساڵان هەیە كە دایكی خنكاوە.

ئەوەشیخستەڕوو خیزانێكی 11 كەسیش لەسەر هەمان بەلەم بوون، بەڵام لەرووداوەدا هەشتیان گیانیان لەدەستداوە و تەنها سیانیان رزگاریان بووە.