كەمی ئاوی موغەزی تەنگ بەنەخۆشخانەكان هەڵدەچنێت

PM:02:05:08/01/2018
ژیان: هەولێر
كەمبوونی ئاوی موغەزی لەنەخۆشخانە حكومییەكانی هەرێمی كوردستان گرفتێكی گەورەی دروستكردووە، نەخۆشەكان ناچارن خۆیان لەدەرەوە بیكڕن بۆ ئەوەی چارەسەریان بۆ بكرێت، ئەوەش بارێكی قورسی لەسەر دروستكردوون.

ئەو كێشەیە ماوەی 15 رۆژە سەریهەڵداوە، كە كێشەی گەورەی بۆ نەخۆشخانە حكومییەكان دروست كردووە، بەو پێیەی ئاوی موغەزی پێداویستییەكی سەرەكی‌و سەرەتایی نەخۆشخانەكانە، بۆ چارەسەركردنی ئەو كەسانەی سەردانیان دەكەن.

بەهۆی كەمی ئاوی موغەزییەوە، نەخۆشەكان ناچاربوون خۆیان لەدەرەوەی نەخۆشخانەكان بیكڕن، بەتایبەتی ئەوانەی باری تەندروستیان پێویستی بەچارەسەری بەپەلە هەبووە، ئەوەش دوای ئەوەی پزیشكەكان ئاگاداریان كردونەتەوە لەكەمی ئاوی موغەزی.

عەلی نوری، دانیشتوی شاری هەولێر كە بۆ نەشتەرگەری شەویلاگ سەردانی نەخۆشخانەی رزگاری شاری هەولێری كردبوو، یەكێكە لەو كەسانە كە داوای لێكراوە خۆی ئاوی موغەزی لەدەرەوە بكڕێت.

"رۆژی دووشەممەی رابردوو نۆرەی نەشتەرگەریم هەبوو كە سەردانی نەخۆشخانەم كرد داوایان لێكردین لەدەرەوە چەند بوتڵێك ئاوی موغەزی بهێنین، چونكە ئاوی موغەزی پێویست لەبەر دەست نییە ".

عەلی بۆ (ژیان) باسی لەوەشكرد، چەند كەسێك لەو رۆژەدا لەگەڵ ئەو چونەتە دەرەوەی نەخۆشخانە بۆ كڕینی ئاوی موغەزی و لەدەرەوەی نەخۆشانەو لەبازاڕ ئاوی موغەزیان كڕیوە.

وتیشی "هەر بوتڵێك ئاوی موغەزیان بە 1250 دینار كڕی‌و پاشان نەشتەگەرییەكەیان بۆ ئەنجامدرا".

زۆربەی ئەو كەسانەی سەردانی نەخۆشخانەكان دەكرێن‌و داخڵدەكرێن، چەند بوتڵێك ئاوی موغەزیان بۆ دادەنرێت تا لەگەڵ چارەسەرە پزیشكییەكانی دیكە، یارمەتی چاكبوونەوەی بدات.

ئەو ئاوە هێز دەبەخشێتەوە بەبەر ئەو كەسانەی كە نەخۆشی هێزی لێبڕیون، یان بەهۆی نەخۆشییەكەیانەوە ئارەزووی خواردنیان لەدەستداوەو زۆر بێهێز بوون.

دكتۆر خۆشناو محەمەد، پسپۆڕی نەشتەرگەری دەم‌و روو و شەویلاگ بە (ژیان)ی راگەیاند "كێشەی ئاوی موغەزی لە ناوەڕاستی مانگی كانونی یەكەمی 2017، سەریهەڵدا كە كەمبوونەوەیەكی بەرچاوی بە خۆیەوە بینی لەنەخۆشخانە حكومییەكان".

وتیشی "راستە نرخی بوتڵی ئاوی موغەزی كەمە، بەڵام زۆرینەی ئەو نەخۆشانەی كە سەردانی نەخۆشخانە دەكەن پێویستیان بە ئاوی موغەزی دەبێت‌و بۆیە هەر كەمبوونەوەیەك كێشەی گەورە دروست دەكات".

سەرهەڵدانی ئەو كێشەیە هاوكاتە لەگەڵ كەمی دەرمان‌و كێشە تەندروستییە كەڵەكەبووەكان لەهەرێمی كوردستان كە بێ چارەسەر ماونەتەوە، بەپرسانی ئەو كەرتە هۆكارەكەی بۆ قەیرانی دارایی‌و نەناردنی دەرمان بۆ هەرێم لەلایەن حكومەتی عێراقەوە دەگەڕێننەوە.

بەوپێیەی هەرێم بۆ دابینكردنی بەشێك لە پێداویستییە تەندروستییە سەرەكیەكان پشت بەحكومەتی عێراق دەبەستێت، بۆیە بەرپرسانی وەزارەتی تەندروستی دوای گەورەبوونی كێشەی كەمی ئاوی موغەزی، هانایان بۆ وەزارەتی تەندروستی عێراق بردو بەشێوەیەكی كاتی كێشەكە چارەسەركرا.

وتەبێژی وەزارەتی تەندروستی حكومەتی هەرێم دان بەكێشەی كەمبوونەوەی ئاوی موغەزی دەنێت‌و دەڵێَت، دوای ئەوەی لە نەخۆشخانە حكومییەكانی هەرێمی كوردستان، كێشەی كەمی ئاوی موغەزی دروست بوو پەیوەندیان بە وەزارەتی تەندروستی عێراقەوە كردووە.

خالس قادر، كە هاوكات بەڕێوەبەری دیوانی وەزارەتی تەندروستی حكومەتی هەرێمە بە (ژیان)ی راگەیاند، ئەنجامی هەوڵەكەیان لەگەڵ وەزارەتی تەندروستی عێراق بۆ چارەسەری كێشەكە ئەوەبوو، دووسەدو سی هەزار كارتۆن ئاوی موغەزی بۆ هەولێر دابینكرا، لەگەڵ سەد و چل هەزار بۆ دهۆك  و دووسەدو 42 هەزاریش بۆ پارێزگای سلێمانی دابینكرا.

وتەبێژی وەزارەتی تەندروستی وتیشی "بڕیارە بەشێكی تری ئاوی موغەزی بۆ نەخۆشخانە حكومییەكانی هەرێم بێت، كە بەشی یەك ساڵی نەخۆشخانەكانی هەرێم دەكات".