كەجەكە زانیاری ووردی لەسەر دوو دەستگیركراوەكەی میت بڵاوكردەوە

PM:06:08:03/01/2018
كورد میدیا: هاوسەرۆكایەتیی كۆنسەی بەڕێوەبەریی كۆما جڤاكێن كوردستان- كەجەكە چەندین زانیاریی و بەڵگەی گرنگی لە بارەی ئەو بەڕێوەبەرە پلەبەرزانەی میتی تورك ئاسكرا كرد، كە پێشتر لەلایەن گەریلاكانەوە دەستگیركرابوون.

ئاژانسی هەواڵی فورات بڵاوی بڵاوی كردەوە، ئەمڕۆ هاوسەرۆكایەتیی كۆنسەی بەڕێوەبەری كەجەكە "لە ئەنجامی ئۆپەراسیۆنی تۆڵەكردنەوەی شۆڕسگێڕیی ساكینا جانسز" بەڵگە و زانیاریی گرنگی لە بارەی بەڕێوەبەرانی بەدیلگیراوی میت بڵاوكردەوە.

بەپێی ڕاگەیەنراوەكەی كەجەكە، كە ئەو دوو بەڕێوەبەرە پلەبەرزەی میت لەلایەن شەخسی هاكان فیدان، پلەبەرزترین بەرپرسی میتی تورك ئەركدار كراون بە فەرمانی ئەردۆغان.

كەجەكە ڕایگەیاند: لە ئەنجامی ئۆپەراسیۆنی گەریلاكانی هەپەگە بۆ بەدیلگرتنی بەڕێوەبەرانی میت، زانیاریی و بەڵگەی زۆر گرنگ كەوتە دەست پەكەكەوە و زیان و گورزی قورسی بە جەستەی میت گەیاند.

لە ڕاگەیەندراوەكەی كەجەكەدا جەخت كراوەتەسەر "سیاسەتی ئینكاركردن و لەناوبردنی دەوڵەتی تورك" كە دژی گەلی كورد بەڕێوەی دەبات.


ڕاگەیەنراوەكە دەڵیت"ستراتیژیی بنەڕەتی كۆماری توركیا لەناوبردن و قڕكردنی گەلی كوردە، بۆیەش سیاسەتی ئاوارەكردن و سزادانی دژی گەلی كوردی هەرگیز نەوەستاندوە و بەردەوام بووە، بەم شێوەیە هەوڵدەدات هێزەكانی گەریلا لەناوببات و ئیرادەی گەلی كورد تێكبشكێنێت و گۆشەگیریی لەسەر ڕێبەر ئاپۆ قورستر كردووە، كۆماری توركیا دژی گەلی كورد، گەریلا و ڕێبەر ئاپۆ هەموو جۆرە ئامرازێك بەكاردێنێت، دەسەڵاتداریی فاسیستی ئاكەپە و مەهەپە لە بەرامبەر تێكۆشانی ئازادیی گەلی كورددا لاواز بوون و بۆیەشە شەڕی تایبەت دژی گەلی كورد بەرێوەدەبەن".

كەجەكە نوسیویەتی"چۆن دەوڵەتی تورك بە هاوكاریی ناتۆ و ئەمریكا گەلەكۆمەی دژی ڕێبەری گەلی كورد بەڕێووەبرد و هەوڵیدا لەو ڕێگایەوە بزووتنەوەی ئازادی گەلی كورد لەناوببات، ئەمڕۆ كە دەسەڵاتداریی فاشیستی ئاكەپە و مەهەپە ڕوو لە ڕووخانە هەوڵدەدات بە شێوەی دیكە گورز لە بزوتنەوەی ئازادیخوازی گەلی كورد بدات و خۆی لە ڕووخان ڕزگاربكات".

لەبارەی تیرۆركردنی ساكینە جانسز-یش لەڕاگەیەنراوەكەدا هاتووە"لە ساڵی ٢٠١١ بە تیرۆركردنی ساكینە جانسز، یەكێك لە دامەزرێنەرانی پەكەكە، و فیدان دۆغان، دبلۆماتی كورد و لەیلا شایلەمەز، پێشەنگی ژنانی گەنج، پیلانی لەناوبردنی گەلی كوردی جارێكی دیكە بەڕێووەبرد، دواتریش بەردەوام بوو لەسەر ئەو سیاسەتە و بە دەستگیركردن و زیندانیكردنی هاوسەرۆكانی شارەوانییەكان، پەرلەمانتارەكان و هەزاران سیاسەتمەداری كورد دیسان نەیتوانی بەرخۆدانی بزوتنەوەی ئازدیخوازی گەلی كورد بوەستێنێت لە تێكۆشان، فاشیزمی ئاكەپە و مەهەپە بە مەبەستی ئەوەی خۆیان لە لەناوچون ڕزگاربكەن و خۆیان بەهێز پیشان بدەن، بە فەرمانی ئەردۆغان لەناو میتدا یەكینەیەكی تایبەتیان دامەزراند بۆ تیرۆركردن و ڕفاندنی بەڕێوەبەرانی پەكەكە".

كەجەكە دەشڵێت"بەو مەبەستەش دوو بەڕێوەبەری پلەبەرزی میتی ئەركداریان كردووە بۆ ئەوەی لە نزیك هەرێمەكانی پاراستنی مەدیا ئۆپەراسیۆن دەستپێبكەن دژی بەڕێوەبەرانی پەكەكە، پاش ماوەیەكی كەم هێزەكانمان هەستیان بەو ئۆپەراسیۆنە كرد، دەستیان كرد بە چاودێریكردنی ئۆپەراسیۆنەكەیان، دوو بەڕێەبەری میت كە بۆ چەندین مانگ خۆیان ئامادەكردبوو، ڕێك لەو كاتەی ویستیان ئۆپەراسیۆنەكەیان بخەنە بواری جێبەجێكردنەوە، لەلایەن یەكینەیەكی هەپەگەوە لە چوارچێوەی ئۆپەراسیۆنی تۆڵەسەندنەوەی شۆڕشگێڕیی ساكینە جانسز، ئەو دوو بەڕێوەبەرەی میت بەدیلگیران، ئەو دوو بەڕێووەبەرەی میت لە ئەنجامی ئۆپەراسیۆنێكی شۆڕشگێڕانی هەواڵگریدا دەستگیركران، ئەوان دوو سەرۆكی ناوەندێك بوون كە بە فەرمانی ئەردۆغان و لەژێر چاودێریی هاكان فیدان كاریان دەكرد".

كەجەكە لە بەردەوامیدا بەم شێوەیە ناسنامەی ئەو دوو بەڕێوەبەرەی میتی ئاشكراكردوە: "ئەرهان پەكچەتین و ئایدین گونەل بۆ ماوەی ٢٠ ساڵ لە شوێنە جیا جیاكانی كوردستان لە پۆستە باڵاكانی میتدا كاریان كردووە، ئەرهان پەكچەتین سەرۆكی جیاكردنەوەی كاروباری (ئتنیكەكان)ی ناوخۆی میتە، كە یەكێك لە ستراتیژیترین لقەكانی میتە، هەروەها ئایدین گونەل بەڕێوەبەری سەرچاوە مرۆییەكانی میتە و لە ناوخۆ و دەرەوەی وڵات كاری كردووە، بەهۆی پۆستە باڵاكانیانەوە لەناو میتدا، زانیارییان لە بارەی وردەكاریی هەموو ئۆپەراسیۆنەكانی میتەوە لە دەستدا بووە".

هەروەها ڕاگەیەنراوەكە دەڵێت"پێشتریش دوو بەرپرسی ناوچەیی میت لە جزیرە و لە كاتی بەرخۆدانی خۆبەڕێوەبەری باكوری كوردستان دا دەستگیركرابوون و زانیاریی زۆر گرنگمان لەوانیشەوە بە دەست هێناوە، ئەو زانیاری و بەڵگانەی لەو بەڕێوەبەرانەی میت بە دەستمان گەیشتووە، دەردەكەوێت، كە ئاكەپە چ پیلانگێڕییەكی بەرفراوانی دژی گەلی كورد، سۆسیالیستەكان و هەموو ڕۆشنبیران و و نووسەرەكان و عەلەوییەكان و هێزەكانی ئۆپۆزسیۆن بە دەستەوە بووە".


كەجەكە ئاشكراشی كردوە "سەبهادین ئاسال، یەكێك لە بەڕێووەبەرانی میت لەگەڵ محەمەد دەرویشوغڵو وەكو شاندی دەوڵەت بەشداری چاوپێكەوتنەكانی ئیمرالی دەبوون، پیلانی كۆمەڵكوژی پاریس لە ساڵی ٢٠١٣دا لەلایەن ئەوانەوە داڕێژراوە و ئەوەش پیلانگێڕیی بەرفراوانی ئاكەپە و میت پیشان دەدا، هەروەها بەپێی ئەو زانیارییانەی بە دەستمان گەیشتوون، دەوڵەتی توركیا ڕۆڵی زۆر گرنگی هەبووە لە تێكچوون و هەڵوەشاندنەوەی سوریا".

نوسیویشیانە"لەو ئۆپەراسیۆنەدا كە لە مانگی ئابی ٢٠١٧دا دەستیپێكرد، زانیاریی لە بارەی ناوەندەكان و ڕێكخراوەكانی میت، سیخوڕەكانیان و كارمەندەكانیان هەروەها پەیوەندییەكانی دەرەوە و ناوخۆیان بۆ ئێمە ئاشكرا بوون، كۆمەڵكوژیی لە پاریس و هەروەها تیرۆر لە ڕۆژئاوای كوردستان و چەندین چالاكیی دیكەیان بۆمان كەشف بوون، لەلایەكی دیكەوە ناسنامەی ئەندامان، سیخوڕەكان و كارمەندەكانی میت لە باكوری كوردستان بۆ هێزەكانمان ئاشكرابوون، بەدەستخستنی ئەو زانیارییانە گورزی زۆر قورسی لە تۆڕی سیخوڕیی میت لە باكوری كوردستان داوە".

لەدرێژەی راگەیەنراوەكەی كەجەكەدا هاتووە"بە ئەنجامدانی ئۆپەراسیۆنی تۆڵەسەندنەوەی شۆڕشگێڕیی شەهید ساكینە جانسز، ژمارەیەكی زۆر لە پیلانگێڕییەكانی حكومەتی ئاكەپە دژ بە گەلی كورد پووچەڵ كرانەوە، ئەردۆغان و دەوڵەت باخچەلی چاوەڕێی ئەویان دەكرد، كە لە ئەنجامی ئۆپەراسیۆنی میتدا ژمارەیەك لە بەڕێوەبەرانی پەكەكە تیرۆر بكرێن، بەڵام ئەو ئۆپەراسیۆنەیان بێ ئەنجام مایەوە و بە بەدیلگرتنی ئەو ئەندامانەی میت گورزێكی وەهایان لێدرا كە قەت پشتڕاست نەكەنەوە".

لەكۆتایی ڕاگەیەنراوەكەدا نوسراوە"پاش ئەوەی هەموو وردەكارییەكانی تۆڕی سیخوڕیی میت لە باكوری كوردستان بۆ هێزەكانمان ئاشكراببێت، زانیاریی پێویست لەو بارەیەوە بە ڕایگشتی ڕادەگەیەنین، لەلایەكی دیكەوە بانگەوازی گەلەكەمان و ڕایگشتی و هێزە دیموكراتییەكان دەكەین، كە هۆشیار بن سەبارەت بەو هەواڵ و زانیارییانەی دەوڵەتی تورك لە چوارچێوەی شەڕی تایبەتدا بڵاویان دەكاتەوە".