دایەڵۆگێكی ڕۆشنبیری وئەدەبی لەگەڵ خاتوو گەلاوێژ

PM:09:11:20/12/2017
ژینۆ عەبدولڵا*
بە مەبەستی هە ڵسەنگاندنی وێب سایتی Galawezh.com گفتوگۆی چەند دۆسیەیەكی ئەدەبی و ئەدەبیاتی گەلاوێژخان، دەستەی وێب سایته‌كه‌ (پ.د.زاهیر لەتیف كەریم وپ.د.نیان نەوشیروان مەستی و ژینۆ عەبدوڵڵا)، و مامۆستا مستەفا ساڵح كەریم ودكتۆر حەمە دلێر میسری ودكتۆر شێركۆ عەبدوڵڵا وستران عەبدوڵڵاو محەمەد عوسمان سەردانی خاتوو گەلاوێژ ساڵح فەتاح یان كرد.

لەم دانیشتنەدا جەخت كرایە سەر چەند تەوەرێك كەهەندێكیان پەیوەندی بەوێب سایته‌كه‌وه‌ هەبوو ئەوانی تریش بەڕۆشنبیریەتی گشتی و ئەدەبیاتی گەلاوێژ بەتایبەتی.

دانیشتنەكەش كەشوهەوایەكی ئازادانەی لەخۆ گرتبوو ولەهەمان كاتیشدا تەواو دووركەوتبۆوە لەچەمكە سیاسی وفیكرییەكانی سەردەم. بەپێچەوانەوە سەرجەم ئامادەبووان تەواوی سەربەستی ڕادەربڕینیان هەبوو كەبێگومان كۆی بۆچوونەكان لەبەرژەوەندی ڕۆشنبیرییەتی كوردیدا بوو.

زۆربەی پرسیارەكانیش ڕووبەڕوی خاتوو گەلاوێژ دەبووەوە و ئەمیش بەئاستێكی بەرزی ڕۆشنبیرییەوە وەڵامی زۆرێك لەپرسیارەكانی دەدایەوە.

لەو نێوەندەشدا ئامادەبووان دەكەوتنە گفتوگۆیەكی ڕاشكاوانەی ڕۆشنبیرییەوە وەك ئەوەی هەمووان لەیەك كاتدا بەشدار بن لەئامادەكردنی پرسیارەكان ووەڵامەكانیشی.

بەشێك لەپرسیارەكان تەرخانكرا بۆ ئەزموونی گەلاوێژ و لەمیانەی دایەڵۆگەكاندا ئامادەبووان گەیشتنە ئەو ڕاستییەی كەبنەمای چیرۆك و ڕۆمانەكانی گەلاوێژ سوودێكی زۆری لەواقیعی كۆمەڵگا بینیوە بەتایبەتی چینی هەژار وزوڵملێكراوەكان.

ئەمەش بەو مانایەی كەگەلاوێژ لەنزیكەوە وبەهۆی تێكەڵبوونی بەچینە جیاوازەكانەوە توانیوێتی لەناخی تاكی كوردی بگات و بەرجەستەشیان بكات.

ئەمە جگە لەسوود وەرگرتن لەئەزموونی كەڵە نووسەرە عەرەب وئەوروپاییەكان.دواتر جۆری پرسیارەكان گۆڕا بەرەو گرنگیدان بەوێب سایتی گەلاوێژ كەئێستا نزیكەی نیوەی بەرهەمەكانی گەلاوێژ چۆتە نێو پڕۆسەی دابەزینی بەرهەمەكان بەبێ بەرامبەر.

لەئایندەیەكی نزیكیشدا بەرهەمەكانی تر دەچنە نێو هەمان پڕۆسەوە.لەهەمان كاتدا باس لەوەش كرا كەبەشێك لەبەرهەمەكانی گەلاوێژ وەرگێڕێتە سەر زمانە بێگانەكان بەنموونەی زمانی عەرەبی وئینگلیزی.

ئەمە جگە لەوەی كە بۆ جارێكی تر سەرجەم بەرهەمەكانی گەلاوێژ چاپ بكرێتەوە و بەڕاستەوخۆ بكەوێتە بەردەست خوێنەرانەوە. ئەم كارەش لەئایندەیەكی نزیكدا بەئەنجام دەگەیەنرێت. ئامادەبووان و بەشدرابووان تەواو دانیشتنەكەیان دەوڵەمەند كرد. 


*بەرێوبەری سایتی گەلاوێژ