مەحمود سەنگاوی وەڵامی بنەماڵەی كاوە گەرمیانی دەداتەوە

PM:02:50:07/12/2017
كورد میدیا:
مەحمود سەنگاوی، ئەندامی سەركردایەتی یەكێتی ڕەتی دەكاتەوە داوای سوڵحی لە بنەماڵەی (كاوە گەرمیانی) كردبێت و ئاماژە بەوە دەكات، ئەو هەواڵە دورە لە ڕاستییەوە.

پاش ئەوەی لەچەند دەزگایەكی ڕاگەیاندن لەزاری (شیرین ئەمین)، هاوسەری رۆژنامەنوسی تیرۆركراو (كاوە گەرمیانی) ئەوە بڵاو كرایەوە كە (مەحمود سەنگاوی) ئەندامی سەركردایەتی یەكێتی داوای سوڵحی عەشایەری لەبنەماڵەی ئەو رۆژنامەنوسە كردوە، سەنگاوی لەڕێگەی رونكردنەوەیەكەوە ئەو لێدوانە رەت دەكاتەوە.

دەقی ڕوونكردنەوەكە

كوردستانیانی خۆشەویست
دەزگاكانی ڕاگەیاندن و لایەنە پەیوەندیدارەكان
پاش بڵاوبوونەوەی چەند هەواڵێكی بێ بنەما لە وێبسایتەكانی "شار پرێس و ئاوێنە" كە تێیدا هاوسەری خوالێخۆشبوو (كاوە گەرمیانی) ڕایگەیاندووە كە هەڤاڵ مەحمود سەنگاوی داوای سوڵحی عەشائیری لە بەنماڵەكەیان كردوە دەربارەی كەیسی تیرۆركردنی ڕۆژنامەنووس كاوە گەرمیانی.

لێرەدا بە پێویسیتی دەزانین وەك سكرتێری ڕۆژنامەوانی هەڤاڵ مەحمود سەنگاوی ڕایبگەیەنین كە ئەو هەواڵە دورە لە ڕاستییەوە و بە هیج جۆرێك لە جۆرەكان هەڤاڵ مەحمود سەنگاوی داوای سوڵحی عەشائیری لە بنەماڵەی خوالێخۆشبوو كاوە گەرمیانی نەكردوە و دور و نزیك ئاگاداریی هیچ داوایەك نین كە ئاڕاستەیی ئەو بنەماڵەیە كرابێت. وەك لای هەموان ئاشكرایە، دادگا بێ تاوانیی و بێ بەریی هەڤاڵ (مەحمود سەنگاوی) لەو كەیسەدا ڕاگەیاندووە.

سكرتێری ڕۆژنامەوانی هەڤاڵ مەحمود سەنگاوی