پەكەكە لەبارەی روداوەكەی مەخمورەوە داوا لە حكومەتی عێراق دەكات بێتە دەنگ

AM:11:39:07/12/2017
كورد میدیا:
ئەنجومەنی گەلی مەخمور ڕایدەگەیەنێت، هێرشەكەی شەوی ڕابروو بۆ سەر كەمپی مەخمور، هێرشێكی ئاسمانیی بووە و پێویستە حكومەتی عێراق لەبارەی ئەو ڕووداوەوە رونكردنەوە بدات.

ئەمڕۆ پێنجشەممە، ئەنجومەنی گەلی مەخمور ڕێكخستنێكی سەر بە پەكەكەیە و كەمپی مەخمور بەڕێوە دەبات لەڕێگەی ڕاگەیەنراوێكەوە ئەوە دەخاتەڕوو، حكومەتی عێراق و ئەو هێزانەی كە دەرفەتی هێرشی ئاسمانیان هەیە، بەرپرسیارن لەو هێرشە و پێویستە حكومەتی عێراق لەمبارەیەوە روونكردنەوە بدات.

كەمپی مەخمور لە ساڵی 1996 وە دروستكراوە و، زیاتر لە 12 هەزار ئاوارەی باكوری كوردستانی تێدا نیشتەجێكراون.

پاراستنی ئەمنیەتی ئەو كەمپەكەش لە ئەستۆی گەریلاكانی پەكەكەدایە.

شەوی ڕابردوو هێرشێك كرایە سەر كەمپی مەخمور كە ئاوارەكانی باكوری كوردستانی تێدا نیشتەجێیە، لە هێرشەكەدا بارەگای ئەنجومەنی گەلی مەخمور بە تەواوی خاپوور بووە و لەئەنجامی  هێرشەكەشدا كەسێك شەهیدبوو و 12 كەسی تر برینداربوون.