لە پێنجوێن نیوەی بنكەكان داخراون‌و بەڕێوەبەری نەخۆشخانەیەكی گەورەش دەستی لەكاركێشاوەتەوە

PM:03:04:03/12/2017
ژیان: پێنجوێن
دەستلەكاركێشانەوەی بەڕێوەبەری گشتی نەخۆشخانەی شەهیدانی پێنجوێن، پەردەی لەسەر چەندین كێشەو كەموكورتی هەڵماڵی كە كەرتی تەندروستی ئەو قەزایە بەدەستییەوە دەناڵێنێت.

كێشەكان بەجۆرێك رویان لەزیادبوون كردووە، كە نیوەی بنكەی تەندروستییەكان لەسنوری قەزاكە قفڵیان لەدەرگاكانیان داوەو چارەنوسی ئەو بنكانەی دیكەش كە هێشتا دانەخراون بەناڕونی ماوەتەوە.

زۆری كێشەكان‌و چارەسەرنەكردنیان، بەرێوەبەری نەخۆشخانەی گشتی شەهیدانی پێنجوێنی ناچاركرد دەست لەكاربكشێتەوەو بەشێك لەكارمەندانی تەندروستیش دەڵێن هەڕەشەی وازهێنان دەكەن.

د. خالید كوردی، بەڕێوەبەری نەخۆشخانەی گشتیی شەهیدانی پێنجوێن جەختیكردەوە، هیچ پەیوەندییەكی بەنەخۆشخانەكەوە نەماوە وەكو بەڕێوەبەر، چونكە چەندین كێشەی كەڵەكەبوو لەو شارە لەبواری تەندروستی بونیان هەیەو هیچیان چارەسەر نەكراون، دوای ئەوەی چەندینجار داواكردن بۆ چارەسەركردنیان.

لەماوەی دوو ساڵی رابردودا لەكۆی ٣٠ بنكەی تەندروستی لەسنوری قەزای پێنجوێن‌و ناحیەو گوندەكان ١٥ بنكەیان داخراون، ئەوەش قورسایی زیاتری خستووەتە سەر ئەو بنكانەی كە هێشتا لەدابینكردنی خزمەتگوزاری بەردەوامن.

خالید كوردی وتی "جگە لەو كێشانە هیچ نەسریەمان نییە، ئەمانە هەموو كێشەن چارەسەر نەكراون، ئەگەر فیتپەمپیی ئیسعافەكە بسوتێت دەبێت پارە لەخەڵك وەربگرین یان چاكی نەكەینەوە، ٤٠ كارمەندی خۆبەخشمان هەیە، هیچ پارەیەكیان پێنادرێت‌و هەڕەشەی وازهێنان دەكەن لەدەوام".

پێش دەستلەكاركێشانەوەی لەپۆستەكەی، خالید كوردی ئیدارەی قەزاكەو تەندروستی سلێمانی‌و وەزارەتی لەكێشەكان ئاگاداركردووەتەوە، "تاكو چارەسەری كێشەكان نەكرێت من هیچ پەیوەندیەكم بەو نەخۆشخانەوە نییەو بەرپرس نیم لەهیچ كارو بەرپرسیارێتییەك لەو نەخۆشخانەیە".

بەهۆی كێشەكانەوە، ماوەی زیاتر لەیەك مانگە چوار پزیشكی موقیم لەنەخۆشخانەی قەزاكە مانیان گرتووەو كارمەندانی خۆبەخش كارەكان بەڕێوەدەبەن، كە بەوتەی خالید كوردی ئەوە "نایاسایی‌و ناتەندروستە، بەڵام بەناچاری ئەوەمان كردووە".

لەدوای سەرهەڵدانی كێشەكانەوە، 40 كارمەندی خۆبەخشی تەندروستی لەسنوری قەزاكەدا كاردەكەن، بەڵام ئێستا هەڕەشەی وازهێنان دەكەن، بەهۆی ئەوەی هیچ بڕیارە پارەیەكیان بۆ خەرج ناكرێت.

محەمەد نەجات، یەكێك لەكارمەندانی تەندروستی خۆبەخش، بۆ (ژیان) وتی "ئێمە هیچ شایستەیەكی دارایمان نادرێتێ، بۆیە زۆربەمان دەمانەوێت وازبهێنین چونكە ئەگەر هاوكاریەكمان نەكرێت ناتوانین دەوام بكەین".

هاوڵاتیان ترسیان هەیە بەهۆی كێشەكان‌و چارەسەرنەكردنیانەوە، كارەساتی تەندروستی لەقەزاكەدا رووبدات، بۆیە داوای چارەسەركردنی كێشەكان دەكەن.

سەردار حەسەن، هاوڵاتیەكی سنوری قەزای پێنجوێن باسی لەوەكرد، ئەگەر كەرتی تەندروستی لەپێنجوێن بەم شێوەیە بڕوات كارەساتی گەورە ڕوودەدات، "چونكە تەندروستی وەك كەرتەكانی تر نییە، بەپشتگوێخستن ژیانی هەزاران كەس دەكەوێتە مەترسییەوە".

وەزارەتی تەندروستی رەتیدەكاتەوە، هیچ قسەیەك لەبارەی كێشە تەندروستییەكانی قەزای پێنجوێنەوە بكات، بەپاساوی ئاگادارنەبوون لەوردەكاریی كێشەكان.

خاڵس قادر، وتەبێژی وەزارەتی تەندروستی حكومەتی هەرێم بە (ژیان) ی راگەیاند، ئاگاداری وردەكاری ئەو بابەتە نین بۆیە قسەشی لەبارەوە ناكەن.

ئێستا لەناو سەنتەری قەزای پێنجوێن كە دەكەوێتە نزیكەی (96) كیلۆمەتر رۆژهەڵاتی شاری سلێمانییەوە، تەنیا یەك نەخۆشخانەی گەورەی تێدایە كە بەنەخۆشخانەی شەهیدانی پێنجوێن ناسراوە، لەگەڵ مەڵبەندێكی تەندروستی.

بەپرسانی ئیدارەی قەزاكە جەخت لەبوونی كێشەكان دەكەنەوە، بەڵام دەڵێن هیچ بڕە پارەكیان لەبەردەستدا نییە بۆ چارەسەركردنیان.

زانا رەحمان، قایمقامی قەزای پێنجوێن، وتی "كێشەكان كەڵەكەبوون، لەدەسەڵاتی ئێمەدا نین، بەڵكو پەیوەستن بەو قەیرانە داراییەی كە هەرێمی گرتوەتەوە".

باسی لەوەشكرد، هیچ بڕە پارەیەك لەبەردەستیاندا نیە، بۆ ئەوەی پێداویستیەكان دابینبكرێت بۆ نەخۆشخانەكان.

قایمقامی پێنجوێن، ئاماژەی بەوەشدا وەزارەتی تەندروستیان ئاگاداركردوەتەوە لەبونی ئەو كێشانەو دەستلەكاركێشانەوەی بەرێوەبەر، چاوەڕوانن بزانین چی پێدەكرێت، بۆچارەسەری كێشەكان.