(ژیان) وردەكاریی دۆسیەیەكی بەقاچاخبردنی دەرمان بڵاودەكاتەوە

AM:11:43:27/11/2017
ژیان-دەروون رەشید
چەند بەڵگەنامەیەك كەدەست (ژیان) كەوتوون، وردەكاریی دۆسیەیەكی بەقاچاخبردنی دەرمان دەخەنەڕوو، كە لەڕێگەی تانكەری گازەوە لەهەولێرەوە بۆ سلێمانی گوێزراونەتەوەو لەلایەن ئاسایشەوە دەستی بەسەرداگیراوە.

دەرمانەكان كە 28 كارتۆن بوون، رۆژی 10 مانگی 10 ئەمساڵ لەتەنكەرێكی گازدا دەستیان بەسەردا گیراوە كە لەهەشت جۆر پێكدێن.

بەپێی چەند نوسراوێكی ئاسایشی سلێمانی، شۆفێری تانكەرەكە ناوی (ن.م.ع)ە،  دانی بەهەموو ئەو كارانەدا ناوە كەپێشتر كردونی‌و باسی لەوەكردووە، ماوەی پێنج جارە دەرمان لەلایەن دكتۆر (ر) لە هەولێرەوە دەهێنێت بۆ دكتۆر (ش.ف.ج) لەسلێمانی كە خوێندكاری قۆناغی شەشەمی كۆلێجی پزیشكییەو سەر بەكۆمپانیای (چ)ە بۆ بازرگانی دەرمان‌و پێداویستی.

بەپێی نوسراوەكە، دەرمانەكان كە بریتین لەهەشت جۆر تەنها یەك جۆریان(اگلاق صرف)ی هەیەوە ئەوانی تر هێشتا تەواو نەبوون.

 بەپێی دانپێدانانی شۆفێرەكە، كە وێنەیەكی لەبەردەست(ژیان) دایە، پێنج جار بەرێگای نایاسایی‌و بەتانكەر دەرمانی لەهەولێرەوە هێناوەتە سلێمانی‌و هەر پێنج جارەكەش لای پێشانگای (سەردار) رادەستی دكتۆر (ش.ف.ج) كردوە كە بەئۆتۆمبێلێكی جۆری كامری رەنگ سلڤەر دەرمانەكانی لێوەرگرتووە.

شۆفێرەكە وتویەتی ئەو كارە لەبەرامبەر بڕی ٤٠ هەزار دینار بۆ خاوەن تەنكەرەكە دەكات "ئەو پێنج جارەش كە دەرمانەكانم هێناوە، سوتەمەنیم پێبوەو دەرمانەكانیشم لەپشتی خۆم لەشوێنی نوستنەكە داناوە، بەڵام كۆتاجار كەدەرمانەكانم رادەستی دكتۆر (ش.ف.ج)كرد، ویستم بەرەو تانجەرۆ بڕۆم تا گاز باربكەم، بەڵام لەچواڕیانكەی سەرچنار كەوتمە مەفرەزەی ئاسایشەوەو  دەستگیركرام".

(ژیان) پەیوەندیكرد بەدكتۆر (ش.ف.ج) كەهەستاوە بەوەرگرتنی دەرمانەكان لەشاری سلێمانی لە شۆفێری تانكەرەكە، كە پێشتر ناوبراو لە ئاسایشی سلێمانی دانی بەكارەكەیدا ناوەو وێنەیەكی دانپێدانانەكەی لای (ژیان)ە تیایدا باسی لەوەكردەوە كەكاری لەوجۆرەی كردوەو بەڵێنیداوە دوبارەی نەكاتەوە بەوپێیەی ئەو كارە پیشەی دەرمانسازە، بەڵام ئامادەنەبوو قسە لەسەر ئەو بابەتە بكات.

بەڵام دكتۆر (ر) كە لەهەولێرەوە دەرمانەكانی رەوانەی سلێمانی كردووە كاری لەو جۆرەی رەتنەكردەوەو بۆ (ژیان) وتی "ئەو بابەتە لەرووی یاساییەوە كۆتایی پێهاتووە، خۆشم بەدواداچونم بۆ ئەو بابەتە كردوەو نوسراوەكانمان وەرگرتوەتەوەو سەرجەمی دەرمانەكانیش رێگەپێدراو بوون‌و لەلایەن بەڕێوەبەری گشتی تەندروستی سلیمانیەوە واژۆی لەسەركراوە".

میران محەمەد، بەڕێوەبەری گشتی تەندروستی سلێمانی، دۆسیەی بەقاچاخبردنی دەرمانەكانی بۆ(ژیان) پشتڕاستكردەوەو رایگەیاند، ئەو بابەتەیان رادەستی ئاسایشی سلێمانی كردووەو دۆسیەكە بەكراوەیی ماوەتەوەو دانەخراوە، تائێستاش لە كوالیتی كۆنترۆڵ نەگەڕاوەتەوە، بەڵام ئەگەر لە كوالیتی كۆنترۆڵیش دەربچێت، سەرجەمی دەرمانەكان تەلەف دەكەن، بەهۆی ئەوەی بەشێوازێكی  تەندروست و بەساردكەرەوە نەگوازراونەتەوە.

لای خۆشیەوە، هێرش سەلیم جێگری بەڕێوەبەری تەندروستی سلێمانی بۆ (ژیان) باسی لەوەكرد، راستە كەسێك كاری لەوجۆرەی كردوەو ئەو دۆسیەیەش لای ئاسایشە، بەپێی بەدواداچونەكانی ئاسایش شۆفێری تانكەرەكە كاری یەكەمجاری نەبووەو لەڕێگەی كەسێكەوە دەرمانەكانی لەهەولێرەوە هێناوەتە سلێمانی‌و لە كۆتا جاردا گیراوە.

لەئێستادا تەندروستی سلێمانی، نمونەی دەرمانەكانی وەرگرتوەو ناردویەتی بۆ كوالێتی كۆنترۆڵی هەولێر بۆئەوەی لە كوالێتی دەرمانەكەو شێوازی هەڵگرتنی دڵنیا بینەوەو بەنوسراوی فەرمی وەڵامیان بدەنەوە.
    
هێرش سەلیم، وتی "ئێمە جگەلەوەی كە دڵنیابوینەوە لە باشی‌و خراپی كوالیتییەكەی، لەلایەن ئاسایش‌و لایەنە پەیوەندیدارەكانەوە لێپێچینەوەی بەقاچاخبردنەكەیان لەگەڵ دەكرێت".

 جەحتیكردەوە "بۆیە بەهەرشێوەیەك بێت دەرمانەكان شیاوی بەكارهێنان نین چونكە دەبێت لە كۆنتێنەر(بەراد)دا هەڵبگیرێن نەك بەوشێوەیە بگوازرێنەوە، لەئێستاشدا چاوەروانی وەڵامی كوالیتی كۆنترۆڵدەكەین، بۆئەوەی لێپێچینەوەی یاسایی لەگەڵ بكەین".

پاش ئاشكرابونی دۆسیەكە، بەفێڵ نوسراوێك ئاڕاستەی جێگری بەڕێوەبەری گشتی تەندروستی كراوە، بۆئەوەی بە نوسراوێكی فەرمی داوا لەدەزگا ئەمنییەكان بكات، بەمەبەستی وەرگرتنەوەی ئەو دەرمانانەی كە پشكنینیان هەیەو كێشەی كوالیتی كۆنتڕۆڵیان نییە.

لەو بارەیەوە دكتۆر هێرش وتی، "فێڵەكە" بەوشێوازە كراوە كە نوسراوی ئاسایشیان لەگەڵدا هاوپێچ نەكردووە هەر ئەوەندەیان بەمن وتوە كە دەرمانمان هێناوە و باس لە وردەكارییەكەی نەكراوە تەنیا ئەوەی تێدا نوسراوە "من بەڵێن دەدەم مامەڵە بەردەرمانەوە نەكەم، لەبەر ئەوەی پیشەی من نییە"، بۆیە ئەویش داوایكردووە كە بەپێی یاسا كاری پێویستی بۆبكرێت.

وتیشی "بەڵام دیارە نوسراوەكە بەسەر برادەرانی دەرماندا تێپەڕیوەو راستەوخۆ نوسراویان بۆ ئاسایش كردوە بۆ گەڕانەوەی دەرمانەكان، بەڵام دواتر نوسراوێكی دیكەمان بۆ ئاسایش بۆئەوەی نوسراوە كۆنەكە رابگرن و كاری پێنەكرێت".

 هەروەها دكتۆر هێرش جەختیكرەوە، دوای گەڕانەوەی دەرمانەكان لە كوالیتی كۆنترۆڵ بەدڵنیاییەوە لیژنەی لێكۆڵینەوەی بۆ پێكدەهێندرێت و لێپێچینەوەی یاساییان لەگەڵ دەكرێت.

بەپێی نوسراوێكی دیكەی بەڕێوەبەرایەتی گشتی تەندروستی سلێمانی، كە واژوی (ب.م.ح) بەڕێوەبەری كۆمپانیای(چ) بۆ بازرگانی دەرمان و پێداویستی پزیشكی، لەسەرەو وێنەیەكی لای(ژیان)ە، تیایدا بەڕێوەبەری كۆمپانیاكە بەلێنی پابەند بوون بە رێنماییەكانی وەزارەتی تەندروستی دەدات كە بۆ گواستنەوەی دەرمان بە ئامێری ساردكەرەوەو كاری لەوشێوەیەش دوبارە ناكەنەوە، بەپێچەوانەوە ئامادەن لێپێچینەوەی یاساییان لەگەڵدا بكرێت.

(گ)، كەلە كۆمپانیای(چ) كاردەكات و ناوی تەواوی ئاشكرا نەكرد، دانی بەوەدا كە هەڵەیانكردوە كە بەشێوازێكی نایاسایی و ناتەندروست ئەو مادانەیان گواستوەتەوە، بۆ ژیان وتی "كێشەی یاسایی لەدەرمانەكاندا نەبووە، تەنها ئەوەندە نەبێت كە بەبەراد نەگوازراونەتەوە و بەئۆتۆمبێلێكی بارهەڵگر گوازراونەتەوە،

ئەوەش بەهۆی ئەوەی ئۆتۆمبێلی بارهەڵگر ناوەكەی لەبەڕاد گەورەترەو ئامێری ساردكەرەوەی تێدابووە، هەروەها سەرجەم دەرمانەكانیش پشكنینی كوالیتی كۆنترۆڵیان لەگەڵدابووە، لەئاسایشی سلێمانیش ئەوە پشتڕاستكراوەتەوە.