سەرما بازاڕی لەنگە گەرمدەكات

PM:03:16:26/11/2017
کورد میدیا:ژیان
سەیوان رەفیق (٢٣ساڵ) ساڵانە لەگەڵ نزیكبوونەوەی وەرزی سەرما دەچێتە بازاڕی لەنگە، بۆ ئەوەی جلوبەرگ بكڕێت، ئەوەش بەهۆی سنورداربوونی توانای دارایی‌و گرانی جلوبەرگی نوێوە.

سەیوان بە 35 هەزار دینار پێنج پارچە جلی كڕی، تا زستانی ئەمساڵی پێ بەڕێبكات، بۆ (ژیان) وتی "وەك جاران پارە نییەو نرخی جلوبەرگی نوێ گرانە".

ساڵانە لەگەڵ هاتنی وەرزی سەرما دوكانەكانی جلوبەرگی لەتگە بازاڕیان گەرم دەبێت، بەڵام ماوەی سێ ساڵ زیاترە زیاتر خەڵكی روویان تێدەكەن، بەهۆی قەیرانی دارییەوە.

محەمەد بورهان ( ١٩ساڵ) دەیەوێت بەكڕینی قەمسەڵەیەكی لەنگە زستانی ئەمساڵ بەڕێبكات "لەبازار بە ٥٠ هەزار دینارە، بەڵام لە لەنگە بە ١٠بۆ ١٥ هەزارە، رەنگە مۆدێرن نەبێت، بەڵام زستانی پێ بەڕِێدەكەم".

هەروەها بۆ (ژیان) وتیشی "پێشتر بارودۆخ باش بوو بەتایبەت گەنج بەردەوام بەشوێن جلی جوان‌و كەشخەدا دەگەڕا، ئێستا زیاتر بەشوێن جلی هەرزان دەگەڕێن".

هاوشێوەی دوكانەكانی تایبەت بەجلوبەرگی نوێ، نرخی جلوبەرگی لەنگەش بەپێی جۆرو كوالێتیان جیاوازە، بەڵام بەراورد بەجلوبەرگی نوێ هەرزانترن.

شێوە عەلی كە لەبازاڕی لەنگەی سلێمانی سەرقاڵی كڕینی جلوبەرگ بوو وتی "زۆربەی كات من هاتوم بۆ بازاری لەنگەو هەرشتێكم لاجوان بوبێت كریومە".

وتیشی "كچان زیاتر گرنگی بەپۆشینی جلوبەرگ دەدەن، بۆیە لەپیاوان زیاتر روو لەبازاڕی لەنگە دەكەن".

 جلوبەرگی لەنگە بەزۆری لەوڵاتانی بەریتانیاو نەرویج‌و سویدو كۆریا‌و توركیاوە هاوردە دەكرێن، دوكاندارەكان بەتەن یان گوێنی دەیكڕن دواتر خۆیان نرخی لەسەر دادەنێن.

بەكر سەعید خاوەنی دوكانی لەنگە لەسلێمانی بۆ (ژیان) وتی "هەموو ساڵێك لەگەڵ هاتنی وەرزی سەرما بازاڕی لەنگە گەرم دەبێت، چونكە نرخی هەرزانترە".

وتیشی "هەرچەند نرخی جلوبەرگی مۆدەو نوێ بەگشتی كەمێك دابەزیوە، بەڵام هاوڵاتیان پارەیان نییە".
قەمسەڵە، بلوز، پێڵاو و پێداویستییەكانی دیكەی زستان، زۆرترین خواستیان لەسەرە، نرخیان لەهەزار دینارەوە دەست پێ دەكات تا نزیكەی 30 هەزار.

نەسرەدین حەسەن شارەزای ئابوری پێیوایە، بەهۆی قەیرانی داراییەوە، هاوڵاتیان پارەیان بۆ پێداویستیە گرنگەكانی وەكو خواردن نییە، بۆیە كەمتر گرنگی بەجلوبەرگ‌و كەلوپەلی رازاندنەوە دەدەن.

هەروەها بۆ (ژیان) باسی لەوەكرد، جاران زۆرێك پێیان عەیب بوبێت بچنە بازاڕی لەنگە ئەمڕۆ بووەتە شتێكی ئاسایی بەهۆی نەبونی پارەوە.